أكل الأكابر بجنيه

ماركت شهير بباب كبير وناس كتير هنا وهناك 

في ست تايهه  عماله تحسب ..تشيل وتحط على قد الحال 
باشا خطير عمال يشيل أصناف كتير من غير حساب    
سواق الهانم عمال يعبي يملا ويفضي من كل نوع ياخد مايخلي 
في ركن بعيد ولد شريد واقف سرحان دماغه شارده وعيونه سارحه جنب الحيطان
رجليه بترعش وإيديه بترجف ولسانه ساكت وعنيه بتصرخ يا ناس جعان 
قرب شويه ومد إيده شاور عليها من غير كلام 
 بياعها سأله من دي بتقصد أوزن بكام 

بجنيه إديني معلش يا سيدي هو اللي في جيبي ومفيش كمان 
بياعها ضحك بسرعه قاله دي بضاعه غاليه مالكش فيها أكل الأكابر ميزانه غالي مالك وماله ده أنت غلبان 
بص لفلوسه وحبس دموعه وفضل سرحان 
ده جنيه بحاله عمال ألمه وأمني نفسي بقرب المحال
آه يا بلدي مين اللي سرقك وجوع ولدك وقتل الفرحه في قلب العيال 
شغالين يا عيني ليلهم ونهارهم لاعرفوا راحه ولا طعم الحنان 
لافلوس بيلقوا ولا لقمه سخنه ولا نومه دافيه ولا إطمئنان
آه يا بلدي جنيهك مايسوي لكنه لسه عند الغلابه له مقام